ವಿಸ್ಮಯ ಟಿ.ವಿ ನ್ಯೂಸ್ ಡೆಸ್ಕ್: ಭಾರತ ಸೇರಿದಂತೆ ವಿಶ್ವದಾದ್ಯಂತ 2025ರ ಎರಡನೇ ಮತ್ತು ವರ್ಷದ ಕೊನೆಯ ಚಂದ್ರಗ್ರಹಣ ಸೆಪ್ಟೆಂಬರ್ 7 ರಂದು ಸಂಭವಿಸಲಿದೆ. ಈ ಸಮಯದಲ್ಲಿ ಚಂದ್ರ ಕೆಂಪು ಬಣ್ಣದಲ್ಲಿ ಗೋಚರಿಸಲಿದ್ದು, ಹೀಗಾಗಿ “ಬ್ಲಡ್ ಮೂನ್” ಎಂದು ಕರೆಯಲಾಗುತ್ತದೆ.
ಗ್ರಹಣ ಅಂದ ತಕ್ಷಣ ಕೆಲ ಗೊಂದಲಗಳು ಸಾಮಾನ್ಯ. ಗ್ರಹಣದ ವೇಳೆ ಏನು ಮಾಡಬೇಕು? ಏನು ಮಾಡಬಾರದು. ಆರಂಭ-ಮುಕ್ತಾಯ ಯಾವಾಗ? ಬರಿಗಣ್ಣಿನಲ್ಲಿ ನೋಡಬಹುದಾ? ಚಂದ್ರಗ್ರಹಣ ಕುರಿತ ಇಂತ ಸಾಮಾನ್ಯ ಪ್ರಶ್ನೆಗಳಿಗೆ ಉತ್ತರಿಸುವ ಪ್ರಯತ್ನ ಇಲ್ಲಿದೆ. ಗ್ರಹಣದ ಸಮಯ, ಸೂತಕ, ವೀಕ್ಷಣೆ, ಜ್ಯೋತಿಷ್ಯ ಪ್ರಭಾವ ಸೇರಿದಂತೆ ಸಾಮಾನ್ಯವಾಗಿ ಕೇಳುವ ಪ್ರಶ್ನೆಗಳಿಗೆ ಉತ್ತರ ಇಲ್ಲಿದೆ.
ಭಾರತದಲ್ಲಿ ಚಂದ್ರಗ್ರಹಣದ ಸಮಯ
ಆರಂಭ: ಸೆಪ್ಟೆಂಬರ್ 7ರ ರಾತ್ರಿ 09:57 ನಿಮಿಷ
ಮುಕ್ತಾಯದ ಸಮಯ: ಸೆಪ್ಟೆಂಬರ್ 8ರ ಬೆಳಿಗ್ಗೆ 01:26 ನಿಮಿಷ
ಉತ್ತುಂಗದ ಸಮಯ: ರಾತ್ರಿ 11:00 ರಿಂದ 12:22 ನಿಮಿಷದ ವರೆಗೆ
ಒಟ್ಟು ಸಮಯ: 3 ಗಂಟೆ 29 ನಿಮಿಷ
ಸೂತಕ ಕಾಲ ಯಾವಾಗ ಪ್ರಾರಂಭ
ಭಾರತೀಯ ಪರಂಪರೆ ಮತ್ತು ಹಿಂದು ಧಾರ್ಮಿಕ ನಂಬಿಕೆ ಪ್ರಕಾರ, ಚಂದ್ರಗ್ರಹಣ ಆರಂಭಕ್ಕೂ 9 ಗಂಟೆಗಳ ಮೊದಲು ಸೂತಕ ಕಾಲ ಪ್ರಾರಂಭವಾಗುತ್ತದೆ. ಸೆಪ್ಟೆಂಬರ್ 7ರ ಮಧ್ಯಾಹ್ನ 12:57ಕ್ಕೆ ಸೂತಕ ಕಾಲ ಪ್ರಾರಂಭವಾಗಲಿದ್ದು, ಗ್ರಹಣ ಮುಗಿದ ತಕ್ಷಣ ಸೂತಕ ಕಾಲವೂ ಮುಕ್ತಾಯವಾಗಲಿದೆ. ಸಾಮಾನ್ಯವಾಗಿ ಸೂತಕ ಕಾಲದಲ್ಲಿ ದೇವಾಲಯಗಳು ಮುಚ್ಚಲ್ಪಟ್ಟು, ಗ್ರಹಣದ ನಂತರ ಶುದ್ಧೀಕರಣ ವಿಧಿಗಳೊಂದಿಗೆ ತೆರೆಯಲಾಗುತ್ತದೆ. ಇದು ಅವರವರ ನಂಬಿಕೆಯ ಪ್ರಶ್ನೆ. ನಂಬಿಕೆಯಿದ್ದವರು ಅನುಸರಿಸಬಹುದು.
ಈ ಗ್ರಹಣ ಭಾರತದಲ್ಲಿ ಎಲ್ಲಿ ಗೋಚರಿಸುತ್ತದೆ?
ದೇಶವ್ಯಾಪಿಯಾಗಿ ಪೂರ್ಣವಾಗಿ ಕಾಣಸಿಗುತ್ತದೆ. ಆದರೆ ಹವಾಮಾನ ಸಹಕಾರ ಅವಶ್ಯಕ. ಮೋಡೆ ಅಥವಾ ಮಳೆಯ ವಾತಾವರಣ ಇದ್ದಲ್ಲಿ ಕಷ್ಟಸಾಧ್ಯವಾಗಬಹುದು. ಸಾಮಾನ್ಯವಾಗಿ ಚಂದ್ರಗ್ರಹಣವು ಕೆಲವು ಪ್ರದೇಶಗಳಲ್ಲಿ ಮಾತ್ರ ಗೋಚರಿಸುತ್ತದೆ. ಆದರೆ, ಈ ಬಾರಿಯ ಗ್ರಹಣ ಏಷ್ಯಾ, ಆಫ್ರಿಕಾ, ಯುರೋಪ್, ಅಮೆರಿಕಾ ಸೇರಿಂದತೆ ಹೆಚ್ಚಿನ ಭಾಗಗಳಿಂದ ವೀಕ್ಷಿಸಲು ಸಾಧ್ಯವಾಗುವುದು ವಿಶೇಷ.
Blood Moon 2025: ಬರಿಗಣ್ಣಿನಿಂದ ವೀಕ್ಷಿಸಬಹುದಾ?
ಹೌದು. ಹೌದು, ಈ ರಕ್ತ ಚಂದ್ರಗ್ರಹಣವನ್ನು ಬೈನಾಕ್ಯುಲರ್, ಟೆಲಿಸ್ಕೋಪ್ ಅಥವಾ ಬರಿಗಣ್ಣಿನಿಂದ ಸುರಕ್ಷಿತವಾಗಿ ವೀಕ್ಷಿಸಬಹುದಾಗಿದೆ. ಈ ಚಂದ್ರ ಗ್ರಹಣವನ್ನು ವೀಕ್ಷಿಸಲು ಯಾವುದೇ ವಿಶೇಷ ಕನ್ನಡಕ ಅಗತ್ಯವಿಲ್ಲ. ಸೂರ್ಯ ಗ್ರಹಣದಂತೆ ಚಂದ್ರ ಗ್ರಹಣವು ಕಣ್ಣಿಗೆ ಅಪಾಯವಲ್ಲ. ಚಂದ್ರ ಗ್ರಹಣ ಸುರಕ್ಷಿತ. ಬರಿಗಣ್ಣಿನಿಂದ ನೋಡಬಹುದು.
ಜ್ಯೋತಿಷ್ಯದ ಪ್ರಕಾರ ರಾಶಿ ಫಲ
ಶುಭಫಲ: ಕನ್ಯಾ, ಧನು, ಮೇಷ, ವೃಷಣ
ಅಶುಭಫಲ: ಮೀನು, ಕರ್ಕ, ವೃಶ್ಚಿಕ, ಕುಂಭ
ಮಿಶ್ರಫಲ: ಸಿಂಹ, ಮಕರ, ಮಿಥುನ, ತುಲಾ
ಯಾವ ಸಮಯದಲ್ಲಿ ಚಂದ್ರನು ಕೆಂಪಾಗಿರುತ್ತಾನೆ?
ರಾತ್ರಿ 11:00-12:23ರ ಅವಧಿಯಲ್ಲಿ ಚಂದ್ರ ಕೆಂಪಾಗುತ್ತಾನೆ.
ಮುಂದಿನ ಸಂಪೂರ್ಣ ಚಂದ್ರಗ್ರಹಣ ಯಾವಾಗ?
ಜಗತ್ತಿನ ಬೇರೆ ಭಾಗಗಳಿಗೆ ಮಾರ್ಚ್ 2-3, 2026 ರಂದು ಸಂಪೂರ್ಣ ಚಂದ್ರಗ್ರಹಣ ಸಂಭವಿಸಲಿದೆ.
ಈ ಚಂದ್ರಗ್ರಹಣದ ಲೈವ್ ವೀಕ್ಷಿಸುವುದು ಹೇಗೆ?
ಹವಾಮಾನ ಅಥವಾ ಸ್ಥಳೀಯ ಕಾರಣಗಳಿಂದ ನೋಡಲು ಸಾಧ್ಯವಾಗದಿದ್ದರೂ, ಆನ್‌ಲೈನ್‌ನಲ್ಲಿ ಲೈವ್ ವೀಕ್ಷಿಸಬಹುದು.
ಗ್ರಹಣ ಹೇಗೆ ಸಂಭವಿಸುತ್ತದೆ
ಸೂರ್ಯ, ಭೂಮಿ ಹಾಗು ಚಂದ್ರರು ಒಂದೇ ರೇಖೆಯಲ್ಲಿ ಬಂದಾಗ, ಭೂಮಿಯು ಸೂರ್ಯನ ಬೆಳಕನ್ನು ಚಂದ್ರನನ್ನು ತಲುಪುವುದನ್ನು ತಡೆ ಹಿಡಿಯುತ್ತದೆ. ಈ ವೇಳೆ ಚಂದ್ರನು ಗೋಚರಿಸುವುದಿಲ್ಲ. ಇದನ್ನು ಚಂದ್ರಗ್ರಹಣ ಎಂದು ಕರೆಯಲಾಗುತ್ತದೆ.
ಬ್ಯೂರೋ ರಿಪೋರ್ಟ್ ವಿಸ್ಮಯ ನ್ಯೂಸ್
